Svik.Sarajevo 1984

«Svik, Sarajevo 1984» er eit drama bygd på Magnar Lundemo sitt liv som skiløpar, rikstrenar, familiefar og bygdaaktivist i Meråker. Hovudkonflikten i dramaet tek for seg da han stod fram som varslar til ei heil verd på fjernsyn under OL i Sarajevo i 1984. Her hevda han at finlendarane var bloddopa. Han vart ikkje høyrt, i staden vart han håna og fekk aldri den status han hadde hatt tidlegare. Nokre år etterpå vart det offentleg at finnane hadde dopa seg, og Lundemo hadde hatt heilt rett. Da var Magnar Lundemo død. Dramaet syner livet hans, frå han som 7-åring i 1945 f lyktar over grensa til Sverige saman med faren som var grenselos. Da hadde dei tyskarane i helane. Denne opplevinga gir Magnar den grunnhaldninga kring sanninga som han står for i Sarajevo; du sviktar ikkje deg sjølv, da sviktar du og landet ditt. Dramaet skildrar norsk skihistorie på 1960, 70 og 80-tal, ei storheitstid i Noreg, m.a. VM i Oslo 1966 og i 1982, ja dramaet er og innom Oddvar Brå og staven. VM i Oslo var Lundemo sitt høgdepunkt som rikstrenar. Teaterstykket skildrar ein stor personlegdom, sin kamp for rettferd, men og eit familieliv som skal haldast i hop mellom mykje reising og harde treningsøkter. Dramaet blir framført i Rabarbraparken med profesjonelle og lokale skodespelarar, som spelar eit utal roller: Tysk soldat, kong Olav, Ole Ellefsæter, Harald Grønningen, kona Halldis, faren Martin og mange fleire kjente personlegdomar frå norsk skiliv. Eit idrettsdrama som går på livet og æra laus.